54
PARIS ET MINERVA.
ACcidisse fabulantur iis temporibus, quibus adhuc puer Paris erat inter pastores, ut Dii omnes convocati ad nuptias Thetidis et Pelei accesserint; praeter Eridem sive Discordiam, quam nemo invitarat. Id illa graviter ferens, pomum elegantissimum et pulcherrimum, aureum, cum inscriptione per ostium immisit, PVLCHRIOR ACCIPIAT: Id suscepit Mercurius, ac legit, ut testatur Lucianus. Tum multis Deabus id petentibus magna discordia et contentio orta est inter tres Deas, caeteris his cedentibus; ac Jupiter iussit ad aequissimum, ut tum habebatur, Paridem iudicium id deferri. In Ida monte id accidisse, scribit Ovidius:
Cum Venus et Juno, Pallasque in montibus Idae
corpora iudicio supposuere meo.
Aiunt, hunc ingentibus donis fuisse a Deabus omnibus solicitatum; quippe cum Juno Asiae Europaeque imperinm illi promitteret; Pallas sive Minerva se omnibus Graecis sapientiorem facturam polliceretur; sed Venus mulierum omnium pulcherrimam se illi concessuram diceret; si sibi victoriam de forma adiudicasset. Quam rem ita attigit Ovidius, in epistola Paridis:
Tantaque vincendi cura est; ingentibus ardent
iudicium donis sollicitare meum.
Regna Jovis coniux, virtutem filia iactat, etc.
Iudicium Paridis, de tribus Deabus latum, et numismate Imp. Antonini Pii (quod, ex haereditate patrui sui Francisci, Angelus Maurocenus, D. Marci Procurator accepit) Carolus Patinus, Eques D. Marci, interpretando nuper explanavit eruditissime. Est autem inter has tres Deas semper fere discordia, et contentio, Palladem, Junonem, Venerem; quippe cum molestum appareat civitatibus id, quod plerumque accidit, ut imperiti et stulti peritis et sapientibus dominentur, ut inopes opulentis, inter quos naturalis est prope discordia; ut libidinosi et impuri viris bonis et temperantibus imperent: Nam ut res omnes hae uni adsint, ut idem sapiens sit scilicet, et temperans, et opulentus, est una rerum omnium quam difficillima; quodsi contigerit, nemo illius imperium feret invitus. Minerva haec, sive Pallas, manibus pedibusque iniuria temporum detruncata, in Caesiano palatio, Romae adhuc servatur; Paris autem, pomum in manu gestans, inter Arundeliana quondam monumenta, Londini extitit.