12
HERCVLES, A LABORE
QVIESCENS.
HErcules ille, a Geryonis (tricorporis Hispaniae Regis) potius, quam alterius labore quiescens, humanam speciem bis aequans, et solidae basi affixus, in aula palatii Farnesiani (quae Picturae simul ac Sculpturae publica quasi schola est) reperitur; Graeci artificis opus, giganteo robore, et pulcherrimo corporis decore, prae reliquis valde conspicuum; quae unquam Herculi imagines positae fuerunt. Consecratum illud Pantheo perhibetur, ubi inter caeteros Deos Numen firmitudinis colebatur. Quid autem Hercule laboriosius? quid magis operosum, magis industrium dici aut fingi potest? In cunabulis adhuc iacens, geminos angues elisit; adultus hydram, capitibus pullulantem, in Lerna oppressit; cervam aeripedem, in Maenalo monte, interfecit; in Nemaea silva iugulavit leonem; hospitum carnibus equos pascentem devicit Diomedem; terribilem aprum, in Erymantho monte cepit, vivumque ad Eurystheum attulit; Stymphalides aves sagittis interfecit, et fugavit; taurum, in insula Creta, domuit; Acheloum superavit, Busiridem occidit, Anteum gigantem suffocavit; Calpen et Abylam, montes coniunctos, divisit; aurea mala, ex Hesperidum hortis, sustulit; caelum, iam fesso Atlante, humeris tulit; Cacum et Lacinum, latrones, sustulit; Albionem et Bergionem, iter ipsius impedientes, lapidum imbre perdidit; Tyrrhenum, Boeotiis bellum inferentem, profligavit; Centauros domuit, Augiae stabulum repurgavit; Hesionem, Laomedontis filiam, a ceto liberavit; insulam Con diripuit, Amazones debellavit, Cerberum ad superos traxit, Alcestim ab inferis ad virum reduxit, Lycum adulterum interemit; Aquilam, Promethei iecur in Caucaso exedentem, sagitta traiecit; Cygnum, Martis filium, certamine obruit; occidit Theodamantem, Pylum diripuit; Zeten et Calain, alatos Boreae filios, trucidavit; Zonam torridam incolumis pertransiit; Syrtes etiam pedes superavit; columnas, in Occidente, erexit; Oechaliam urbem delevit, et Jolen, Euryti Regis filiam, vi obtinuit: Hoc fuit negotium Herculis, hoc otium; hic labor, haec quies!