19
MINERVA.
EFfulget Pallas, sive Minerva, quam velut artis regulam ac normam de industria exhibeo: Facta est ex nitente et candido marmore Orientis. Vultus pulcher et heroi congruens, ipsam quasi Virtutem loquitur: Caput galea tectum est, quia cerebrum (ex quo Palladem natam, memoriae prodiderunt) adversus omnes noxas, ac laesiones, semper muniri debet. Ante eandem capita duo arietum conspiciuntur, ad quosvis fortuitos impetus excipiendos; quibus omni non modo contentione, sed etiam dimicatione resistere valeat; si forte opus sit. In galea Sphinx recubat, praeteritarum simul ac futurarum rerum imago; quam Clearchus caput et manus puellae, corpus canis, vocem hominis, caudam draconis, leonis ungues, alas avis habuisse scripsit. Tunica illius candida, sive vestimentum interius, sulcis rugarum minoribus constans, habitus est virginis Vestalis; purissimae castitatis indicium. Pectus eiusdem clypei firmatur praesidio, in quo caput Medusae, cum serpentibus, adversus calumniatores, apparet. Mirificum fuisse huius Deae clypeum, miroque artificio extructum, inquit Natalis Comes; cuius formam ita describit Virgilius libro octavo:
Aegidaque horrificam turbatae Palladis arma,
certatim squamis serpentum, auroque polibant;
connexosque angues, ipsamque in pectore Divae
Gorgona defecto vertentem lumina collo.
Nam ubi illud scutum concuteret, mirificum terrorem illis incutiebat; aut contra quos in bellum prodibat. Pallium illius purpureum, quo Romani Consules amiciebantur, prudens consilium, unicum virtutis fulcrum, denotat: Ceu serpens ipse prudentiam simul innuit. Hasta defensionis telum est, quo mala longius repelluntur. Verbo: Inter omnes vestitas statuas unica haec pro pulcherrima, magnifica, et maxime ingeniosa habetur; quam in porticu Principis Justiniani, cuius gloriae tunc Romae opera ac labore meo deserviebam, singulari studio delineavi; in magno semper pretio habitam, et, dum nos habebimur, porro habendam.