123
pereant, ante se propellens. Istius operis prototypon Raphaelis manu in tabula quadam subactu oleario pictum, in Pinacotheca mea, cum aliis quibusdam, Ralphaelis delineationibus ipse asservo, pro miraculo quodam artis potius, quam pro pictura habitum, nec multis venale, ablatis haud raro nummis, cum praesertim pauca amplius istius artificis in Germania extent opera: unde ob incomparabilem pictoris manum et perfectissimam eius in arte diagraphica peritiam carminibus etiam celebrata est a Barlaeo et Jodoco Vondelio ista tabula.
In eodem cubiculo opus pinxit aliquot in proelio quodam navali captorum, inque terram e navibus expositorum Turcarum, cum historiis adhuc aliis pluribus, parvo opere etiam stylobatis insertis, admirando artificio. Fornix istius Cubiculi a Praeceptore eius Petro Perusino pictus, in illius honorem manebat intactus, ne imperfectionis argueret illum, a quo perfectionis hauserat initia. Post mortem Bramantis Architecti cum totum structurae palatii onus, cum omnibus ibidem perficiendis picturis ipsi soli incumberet, tantae prolixitati haud pari, adiutores sibi adsciscebat Johannem Vedinensem in Alabandensibus et animalibus ad viva exemplaria depingendis, qui simul et plastica gypsata efficeret: Julium Romanum ad imagines: nec non Johannem Franciscum Pennium sive Parmensem, Petrinum Vagum, Peregrinum Mutinensem, Vincentium de S. Geminiano et Polydorum Caravagium, qui historias a se designatas coloribus inducerent.
Porro Romae Amico etiam suo singulari Augustino Chisio anteriorem Palatii porticum pingebat, et in fornice eiusdem Concilium Deorum, ubi ex Antiquis plurima ingeniose inseruit. Deinde connubium etiam Psyches, quae Jovi prandenti ministrat, conspergentibus florum imbre mensam Charitibus. Alio postmodum istius fornicis loco sunt; Mercurius: Jupiter Ganymedem exosculatus: Venus in curru Psychen ad superos traducens, comitantibus Mercurio et Gratiis, cum pueris quibusdam elegantissime abbreviatis Deorum instrumenta portantibus, et animalibus Diis his consecratis. Ubi a Johanne Vedinensi varios appingi curabat encarpos ad ambienda historiolarum plana. Tandem etiam ad Leonis Pontificis mandatum, oecum Constantini pingere coepit, quem morte Raphaelis interiecta Julius deinde Romanus et Johannes Franciscus absolverunt, iuxta illius tamen ideas. Varias etiam picturas elaboravit pro exemplaribus tapetum: et inter alia D. Petri historiam, quae tapetum series in Flandria deinde contexta est septuaginta
mille coronatorum pretio summis festivitatibus adhuc hodie Romae exposita.
Extera.Multa quoque illius opera ad exteros transmissa sunt: Galliarum nimirum Regem, multo comparatus munere, Luciferi lapsus, multis notabilissimis clarus: deinde eodem transmissa S. Michaelis imago; ut et Imago D. Virginis filiolum tenentis; adiectis Josepho, Johanne et Elisabetha, ab Angelis quibusdam floribus conspersis, cuius operis inexplicabilis est dignitas in Regia Lutetiana cum stupore omnium spectandi. Nec minori laude evehenda, quae Fontanis Bellaquensibus asservantur, S. Margareta, et S. Georgius eques, aliquando ab Angliae Rege possessus. Sic Marchionissa Almontiana opus quoddam cum apographo Domino de la Noue concedebat soluto quinquies mille librarum pretio. Eodem modo S. Simonis Dux Deiparae quandam imaginem Autoris nostri possidebat, maximi aestimatam, et Petri Perusini praeceptoris methodum prae se ferentem: praeter plurimas alias Parisiis et alibi existentes, Raphaeli tributas.
Ante tempora igitur Raphaelis Florentinorum Academia per totam Italiam celeberrima erat, a Leonardo Vincio, Michaele Angelo, Bandinello et aliis ad istud gloriae fastigium elevata: emergentibus autem istius Romae studiis, incomparabili inveniendi et exprimendi methodo claris, et ad extremos pingendi apices properantibus Romanis, illi sensim ita descendebant, ut huius discipuli tam firmo magistri optimi posito fundamento superatis tandem omnium adversitatum iugis, iam olim hac in parte feliciorem Romam ad veterem nunc in arte hac reduxerint dignitatem.
Tanta enim in primariis pictoriae partibus Raphaelis erat perfectio, ut non designando tantum et inveniendo dexterrimus esset et irreprehensibilis, sed et venustate Calligraphica, et coloribus tam oleario subactu, quam glutinario, et in albario potissimum tanta uteretur promtitudine, ut quasi indefatigabilis plura solus perfecerit, quam plures alii: in hoc potissimum omnibus superior, quod nunquam fere, vel rarissime errores admiserit, contra regulas extravagando, vel informi quodam defectu admisso opera deproperando vel extremam labori cuidam manum non addendo, sed in omni parte omnia observando naturam potius transcenderit, quam humano tramite decurrerit; scaturiginem omnibus adaperiens verorum totius artis principiorum, quibus a posteritate semel imbibitis nunquam defutura est istorum studiorum satietas atque plenitudo.